طرق صيد السمك في الاسكندرية

كونان · #1 (permalink) 12-21-2008, 11:56 PM

توكلنا على الله
كله يجهز العدة بتاعته وياللا بينا

سمكة البطاطا

مش عارف ليه سموها بطاطا بس في الخليج اسمها الصافي
وهي من اسماك البحر الاحمر والخليج
وعبرت للبحر المتوسط من قناة السويس
زمان على ما اتذكر ان الموسم بتاع البطاطا كان اول يوليو لغاية اخر اغسطس بس
بس دلوقتي موجوده طول السنة
موسم التفريخ بيكون في بداية ابريل
وهي سمكة نهارية يعني مش موجوده بالليل
الطعم المفضل
اولا العجين
سواء عجينة عيش او دقيق
المهم انها تكون عجينة ناشفة

ثانيا الجمبري (البرغوت)
انا ليا طريقة خاصة مع البطاطا
اني ازفر بعيش واصطاد ببرغوت
وازفر معناها اني ابل العيش لغاية ما يبقى مفرول وابتدي ارمية في المية على شكل كورة
ثالثا الخضرة الشعر
بس من ساعة ما حصلت التوسيعات في الكورنيش قلت جدا الخضرة على البلوكات علشان كده مبقاش حد بيستخدمها كتير
من حوالي 15 سنة كده كانت الخضرة اولا

نيجي دلوقتي مع طريقة الصيد
صيد البطاطا بيكون بالبوصة اليد مش الماكينة
مع العلم ان فيه ناس اصطادتها بالماكينة بس صدفة

فيه كذا طريقة لصيد البطاطا بالبوصة
اولا
بالفلة او الغماز او العوامة
الشعر او الخيط الاساسي يكون نمرة 25
والفروع نمرة 20 او 18
بس نمرة 18 مش بيستخدمة الا الخبير لانة ضعيف
ومعروف عن البطاطا انها سمكة قوية وخصوصا الاحجام الكبيرة

السلاح او السنارة نوعين
اما السنارة العادية وتكون نمرة 20 او 22 او 24
ونمرة 24 تسمى رجل الدبانة وتخيلوا حجمها

او الشلاليط وهي سلاح من 3 سنانير ملحومين في بعض زي الهلب
المهم
الفروع تكون قصيرة يعني بالكتير 20 سم

الفلة صغيرة والرصاص او التقل خفيف

العيار (ارتفاع الفلة عن الرصاص ) يكون حوالي ثلثين ارتفاع المية عن الارض
مع الوقت وخبرتك في المكان حتعرف المية عمقها قد ايه

حط العجينة وارمي
اول ما الفلة تغمز نص غمزة الطشها وادعيلي

ثانيا
الصيد من غير فلة (حساس)
وهو نوعين
طريقة اسمها الربع او المشنقة
وهي طريقة مش كل الناس بتقبل عليها لانها متعبة شوية

الشعر زي ما اتفقنا 25
طول الشعر حوالي ثلثين عمق المية
يعني لو بترمي على قرار 3 متر يكون طول الشعر 2 متر
ويفضل استخدام بوصة قصيرة نوعا يعني 4 او 5 متر

السلاح مكون من 6 او 7 سنانير
كلهم نفس الطول اللي هو حوالي 5 سم تحت الرصاصة
ما عدا 2 منهم بيكون طولهم 10 سم
حجم السنانير يكون كبير مثلا نمرة 16 او 14
الرصاص شريط وثقيل يعني لف ثلاث او اربع لفات كده
حط العجينة على الرصاصة ونزلها المية حتلاقي الوحوش بتشدك
الطريقة دي بنستخدمها للبوري برضة

الطريقة الثانية في الحساس هي السبحة
وسموها السبحة لان عدد السنانير بيكون كتير وفوق بعض زي شكل السبحة
ودي بيكون فيها طول الشعر زي طول البوصة
نحط رصاصة بلحة نمرة 1 في اخر الشعر من تحت
وفوق الرصاصة نربط من 7 ل 12 سنارة
الفروع طولها حوالي 10 سم
حط عجينة او جمبري ونزلها المية
حتلاقي وحوش تانية بتشدك برضه

دلوقتي نيجي لافضل اماكن تلاقي فيها البطاطا
حتلاقيها في البحر في اي مكان
بس فيه اماكن مشهورة بالاحجام الكبيرة
السلسلة
لسان الجامعة
كليوباترا
سيدي جابر
لسان جليم الثاني
سان ستيفانو
امام المحروسة
المنتزة
ملحوظة هامة:
احذروا اشواكها لانها بتسبب الم رهييييييييييييب
يمكن للزوار التعليق على هذا الموضوع بواسطة حساب الفيس بوك الخاص بهم .

المصدر: موقع ابناء الإسكندرية - من قسم: الاثار و المناطق السياحية في الاسكندرية

'vr wd] hgsl; td hghs;k]vdm hgsl; wd]

كونان · #2 (permalink) 12-22-2008, 12:19 AM

الشراغيش والتيس

الشرغوش وهو صغير بنسمية جنشور وهو اللي بيبقى لغاية حجم الكف كده
بعد كده بيبقى شرغوش
والتيس شبة الشرغوش بس لونة بيج ومخطط بني
وسموه تيس لانه اول ما يطلع من الماية مش بيتحرك بيتيس يعني
وغير كده انه سمكة غبية جدا وقوية جدا ولما تيجي تطلعة مش بيتحرك من مكانه لغاية لما نفسه يتقطع ويبتدي يطلع بس بيكون عدمك العافية
ياللا بينا نبتدي على بركة الله

موسم الشراغيش
موجوده طول السنة
ولكن
طول الصيف بتكون قليلة جدا
موسم التفريخ بيبتدي شهر سبتمبر
واحلى شراغيش تصطادها من نص اكتوبر لغاية شهر فبراير
موسم طويل مش كده

حنحضر معانا النهارده البوصة اليد والبوصة بالماكينة
لان الشراغيش ممكن تصطادها كده او كده
وممكن تصطادها بالنهار او بالليل
لو بالنهار بيكون لغاية اول ما الشمس تضرب في الماية
لان الشراغيش بتحب الماية الباردة
اول ما الماية تسخن تهرب للاماكن العميقة
ولو باليل يبقى عندك من المغرب للصبح
براحتك يعني

احب اقولكم الاول اماكن تواجد الشراغيش
الشراغيش بتحب الوعر (الصخور)
بتعيش حول الوعر وبتهرب داخله
وسمكة الشراغيش بتعيش في مجموعات
يعني لو اخدت منها واحده ان شاء الله ربنا حيكرمك بغيرها

نبتدي دلوقتي بطرق الصيد

صيد الشراغيش بالبوصة اليد

الشعر الاساسي 25 او 30
وانا بنصح المبتدئين بالشعر ال30
والفروع 25

فيه بعض المتخصصين في صيد الشراغيش بيستعملوا شعر 25 اساسي
والفروع 18
وبيسحبوا بيه شراغيش تعدي الكيلو ونص
احتراف بقى

الصيد يكون بالفلة وتكون من الحجم الوسط
الرصاصة تكون اكتر من ميزان الفلة بحاجة بسيطة
بمعنى
ميزان الفلة بيكون مخلي الجزء الفاصل للفلة هو سطح الماية (نصها فوق ونصها تحت الماية)
احنا نخلي الجزء اللي تحت الماية اكتر شوية يعني الثلث فوق والثلثين تحت
ودي نقدر نظبطها بتقل الرصاصة
حد يسالني ليه نعمل كده؟؟؟
اقولكم انا
لان الشراغيش من الاسماك اللي بتاكل الطعم وتجرة
علشان كده احنا مش عايزنها تحس بمقاومة الفلة ليها وتاكل براحتها
احنا بنحب نريح الزبون

نيجي دلوقتي للفروع
السنانير تكون نمرة 8 او 7
ولو عارف ان فيه احجام كبيرة تستخدم نمرة 5 او 6
طول قرمة الفروع واحده متر ونص والتانية متر وربع
يااااااااااه كل ده
ايوه لان ده بسببين
الاول ان الشراغيش زي ما اتفقنا بتاكل وهي جنب الوعر
يبقى احنا عايزين الطعم يكون عايم فوق الوعر

الثاني ان الشراغيش بتاكل وتجري
يبقى احنا عايزينها تاكل براحتها

العيار يكون تقريبا قد عمق الماية
بمعنى انك تخلي السنارة الطويلة يا دوب تحف في القرار

لما ترمي والسمكة تاكل معاك
مش اول ما الفلة تغمز تشد انت
لا
سيبها لانك بعد كده مش حتشوف الفلة اساسا
ساعتها شدها وانت مطمن
باذن الله بتاعتك
وتخلي بالك لان الشراغيش الكبيرة ليها حركات مفاجئة
بمعنى انها تكون واخداك يمين وانت معاها
مرة واحدة تضرب شمال
لو انت مش صاحي ليها تقطع على طول

نيجي دلوقتي للطريقة الثانية
وهي
البوصة بالماكينة

الشعر الاساسي او شعر الماكينة يكون نمرة 40
الرصاصة زي انت بتفضل او زي ما بتوزن معاك البوصة
الفروع شعر 30 او 35
انا عن نفسي افضل ال35 لانة بيستحمل شوية لو السمكة دخلت الوعر
السنار 4 او 5 بكرش
الفروع يكونو فرعين واحد فوق الرصاصة وواحد تحتها
او الاتنين تحت الرصاصة
ترمي وما تلمش البوش يعني ما تخليش الشعر مشدود
وده لانك بترمي على وعر لو الرصاصة اتحركت حتدخل الوعر
لما السمكة تاكل معاك
سيبها تضرب اول ضربة
وفي التانية رد عليها وبقوة علشان لو سيبتها وحست بالسنارة حتدخل منك الوعر
وان شاء الله السمكة بتاعتك لان الشراغيش نفسها قصير
مش بتقدر تقاوم مده طويلة
صيدها بالماكينة بيكون اسهل من البوصة اليد
دلوقتي بقى نتكلم عن

انواع الطعم للشرغوش

الجمبري النطاط
الجمبري البرغوت
دود البحر
الدود الاسمعلاوي
الجرايات (نوع من الكابوريا الصغيرة)

اشهر اماكن صيد الشراغيش في الاسكندرية

ميناء الاسكندرية
ميناء الدخيلة
الميناء الشرقي
حاجز امواج القاعدة البحرية براس التين
السلسلة
الشاطبي
لسان الجامعة
كامب شيزار
كليوباترا
لسان جليم (الاول والثاني)
سان ستيفانو
لوران
المنتزة
ميناء ابو قير

كونان · #3 (permalink) 12-22-2008, 12:21 AM

السمكة اللي كل الصيادين بيسعوا وراها
القاروس

قبل ما نبتدي احب اقولكم حاجه مهمة
القاروس ليه طرق كتيرة جدا لصيدها ولكن انا مش عارفها كلها
او بمعنى اصح مش متمرس فيها
علشان كده انا حتكلم عن اللي انا متمرس فيه واستخدمته
ياللا بينا نبتدي على بركة الله

اولا لازم نعرف شوية معلومات عن سمكة القاروس

سمكة القاروس من الاسماك اكلة الاسماك مش معنى كده انها بتاكل سمك بس
ولكن بتحب الاسماك

ولازم نعرف معلومة مهمة جدا ان القاروس ممكن يضرب على طعمك حتى لو انت مش بترمي عليه مخصوص
وده كتير بيحصل

مواسم القاروس

القاروس ليه موسمين

الاول : من اول يوليو حتى نهاية سبتمبر (بيكون ضعيف واحجامه صغيرة )
الثاني: من اواخر اكتوبر لاواخر يناير

طرق صيد القاروس

البوصة اليد

بصراحة انا شخصيا القاروس ضرب عليا على البوصة اليد وبالبرغوت وكانت قاروسة كيلو نص ومرة تانية نص كيلو ولكن لو عايز تنزل على القاروس بالبوصة اليد يبقى مافيش غير طريقة واحدة وان شاء الله اقل سمكة تضرب عليك مش اقل من كيلو

الشعر الاساسي نمرة 40
الصيد من غير فلة
الرصاصة بلية صغيرة جدا
شعر الفروع : لا يوجد
محدش يستغرب لانك حتصطاد من غير طعم ولا سنانير
اللي حتصطاد بيه ريشة
ايوة ريشة
علشان كده الطريقة دي اسمها الترييش
زي ما قلنا الشعر الاساسي 40
وتركب الرصاصة وتحتها الريشة ودي بتكون ريشة فراخ عادية وبنختارها تكون من الريش الداخلي يعني المتغطي
بنجيب الريشة ونربط معاها سلاح نمرة 01 وبعد كده نربط سلاح تاني ونسيب شعر حوالي 2 او 3 سم
ونربطة معاهم ونيجي على مكان ربط الشعر وناف عليه شعر حرير (دور واحد ) وفوقهم شيكرتون ونلاحظ اننا واحنا بنربط السلاح التاني نخلي حتة شعر طويلة ونعملها خية لان منها حنوصلها في الشعر الاساسي
وكمان يكون اتجاه الريشة مع اتجاه السلاح بمعنى ان الجزء اللي فيه الريش يكون مع دوران السلاح

جهزنا البوصة والسلاح يبقى مش فاضل غير السمك
القاروس سمكة عايمة بتدخل مع الموج
يبقى كده احنا عايزين موج
نختار مكان يكون فيه موج عالي ونقدر نقف فيه وكل ما عليك انك ترمي في الموجه وتسحب ايدك معاها ولازم وانت بيسحب ايدك توقفها كل شوية علشان تخايل السمكة وتشوف الريشة وهي بتتحرك
بتلاقي (لو ليك نصيب طبعا) عيل صغير بيسحب منك البوصة
اتعامل معاه بقى
بس الطريقة دي مفيش ناس كتير بتستخدمها لانك لازم تنزل تقف في المية في عز الشتا وتخيل بقى شتا ومية ساقعة وموج عالي
بس سمكتها بتنسيك كل ده

الصيد بالبوصة الماكينة
القاروس بالماكينة ليه طرق اشكال والوان بس برضة ارجع واقول ان القاروس بيضرب على اي طعم طول ما هو موجود في المية
لو انت بتصطاد الصبح يبقى ارمي للقاروس بالراباللا
ودي صور لشوية انواع راباللات بتستخدم لصيد القاروس

ده طبعا جنب الطعم
يعني لو رميت بالطعم الصبح عادي حيضرب عليك بس مش زي الراباللا
والصيد بالراباللا سهل كل ما عليك انك تركبها في الشعر وترمي وتجر بسرعة متوسطة السمكة حتضرب عليها كأنها سمكة بتجري

لو بتصطاد بالليل يبقى حترمي بالطعم عادي ولو موجود في المية قاروس حيضرب عليك
وحاول تستخدم سلاح كبير يعني نمرة 01 او 02 او 03
وتعمل سلاحين واحد فوق الرصاصة والتاني تحتها ويكون طولة كبير يعني متر الا ربع تقريبا
ولازم تخلي بالك واوعى تسيب البوصة وتستنى السمكة لما تضرب
لازم تفضل ماسكها لان القاروس من السمك اللي بيجر يعني يحط الطعم في بقة ويجري

دي الطرق اللي اعرفها في صيد القاروس بس فيه طرق تانية كتير جدا وكل منطقة في مصر على ساحل البحر المتوسط ليهم طريقة في صيد القاروس ياريت لو حد يوضحهالنا

نيجي دلوقتي للطعم المفضل للقاروس

الجمبري
نطاط – عقر – بلانص – شطنارة

الدود
قراص – قراص صخر – حنش الطين (بيستخدم في الطرح ) – دود بحر -اسمعلاوي

الجرايات
جرايات خضراء (كبيرة – بندقة ) – تكنيات – بشبش
السردين والسردينيلا
وفيه طعم تاني اول ما شفتة استغربت جدا بس لما استخدمتة لقيت انه جميل جدا وفعال ومش مكلف
شفت صيادين خلف ميناء بتروجيت بيصطادو القاروس بفتلة حرير لونها احمر بعد ما سالت عرفت انها بتنزل المية تتحرك زي الدوده والقاروسة ياعيني مش فاهمة بتاكل وخلاص
استخدمت الطريقة دي مرتين واخدت بيها قاروس

اشهر اماكن صيد القاروس

ميناء الاسكندرية

ميناء الدخيلة
الميناء الشرقي
السلسلة
الشاطبي
سبورتينج
سيدي جابر
سان ستيفانو
المنتزة
الطرح (مصرف المية السخنة)
المعدية
ميناء بتروجيت (للعاملين فقط)
خلف ميناء بتروجيت (مفتوح)
ميناء ابو قير

ملحوظة مهمة : فيه سمك من عيلة القاروس بس مش بيكبر اكبر حجم ليه قد الكف اسمة نقط بضم النون وهو شبه القاروس بالظبط بس فية نقط على ضهره وده بتصطادة من الطرح والمعدية وبيكون عايم

كونان · #4 (permalink) 12-22-2008, 12:23 AM

المياس
للاسف مش لاقي ليها صورة على النت علشان اجيبها
ياريت اللي يلاقي صورة للمياس يحطها
نبتدي على بركة الله
موسم المياس
المياس موجود طول السنة ولكن بيبقى كتير في الربيع والصيف
وفي الشتاء موجود بس قليل

اوقات صيد المياس

من العصر لغاية بعد غروب الشمس بساعة تقريبا
ومن قبل الفجر بساعة لغاية شروق الشمس

مش معنى كده انه مش بياكل باقي اليوم
لا بيبقى موجود بس قليل جدا
انا عن نفسي لما بنزل على المياس بنزل من الساعة 12 بالليل لغاية 7 او 8 الصبح واكبر مياسة جيبتها كانت 4 كيلو تقريبا وجيبتها الساعة 1 ونص بالليل
معنى كلامي ان فيه اوقات معروفة السمكة بتاكل فيها لكن ممكن السمكة تاكل في اي وقت لو موجوده
وكمان مش معنى ان المياس بياكل في اوقات معينة يبقى لازم تاخد منه لا ممكن ماتاخدش منه ولا سمكة مع انه بيكون في الموسم بتاعه وفي الوقت بتاعة

طرق صيد المياس

اللي اعرفهم من طرق صيد المياس طريقتين
الاولى ودي بتكون من المراكب ومش اي صياد بيستخدمها لانها صعبة و الهواة اللي زي حالاتنا مش بيستمتعوا بيها لان الهدف منها بيكون كمية السمك مش مجرد الصيد للمتعة
وهي
غزل السنار
وده بيكون شعر نمرة 100 او 120 وطولة ممكن 200 او 250 متر وبيربطوا كل 2 او 3 متر سنارة كبيرة شوية في سلك مش شعر عادي وبين كل سنارة والتانية يحطوا رصاصة ويطعم في كل سنارة سردينة كاملة او نص سردينة ويفرد الشعر في المية ويسيبة من بالليل للصبح ويرجع يلمة وزي ما ربنا يرزق بقى

نيجي للطريقة التانية اللي كلنا ممكن نعملها

البوصة والماكينة
قبل ما نبتدي نصطاد مياس لازم نعرف ان المياس من الاسماك اللي بتاكل اسماك واللي شاف المياس قبل كده يعرف ان ليه اسنان حادة جدا يعني الشعر العادي ماينفعش معاه لانة ببساطة سنانة عاملة زي الموس فتخيلوا لو انت عديت بالموس على الشعر ايه اللي حيحصل ؟؟
علشان كده بنستخدم سلك صلب
والسلك ده انا عن نفسي اتعلمت ازاي اعمله بس لو تشترية بيكون اسهل بكتير ومش غالي
وهو بيبقى عبارة عن سلك مجدول طولة حوالي 20 سم وملحوم فيه سنارة كبيرة بتكون 05 او 04 على حسب ما انت تختار

حتحتاج كمان بوصة تكون قوية جدا لان مقاومة المياس جامدة انا عن نفسي مش بصطاد المياس الا ببوصة بامبو عاملها على ايدي من اول ما جيبتها خام وقطعتها وحمصتها لغاية ما بقت بوصة يعتمد عليها وهي بوصة حتة واحده 5 متر
مش معنى كلامي ان البوص الفيبر ماينفعش
لا
بس لو بوصة انت واثق فيها
المهم
الشعر اللي حنستخدمة هو الشعر العادي يعني 40 او 50 مش محتاجين شعر جامد لان السمكة مش حتوصلة

الرصاصة متوسطة الوزن

نيجي دلوقتي لاهم جزء في صيد المياس
وهو
الطعم
زي ما قلنا المياس بياكل سمك يبقى احنا لازم نصطاده باللي هو بياكلة
ممكن تجيب سردين من السوق وتشتغل بيه
ولكن
انا بفضل اني ارمي بسمكة من المية اللي حرمي فيها
بمعنى
اني ممكن ارمي بمرمارة او شرغوش او موزة ومش حتصدقوا اني مرة رميت بدنيس بس كان يستاهل
وممكن انك تاخد البوصة العادية معاك وتطلعلك مرمارتين وتحطهم في جردل مية وتشتغ بيهم

نيجي دلوقتي
لطريقة التطعيم
فيه طريقتين
اما انك تعمل السمكة شرايح وتدككها في السنارة عادي جدا بس الطريقة دي مش بتخلي الطعم يعيش معاك كتير في المية لان صيد المياس زي ما قلنا محتاج صبر يعني ممكن ترمي وتقعد جنب البوصة ساعتين تلاتة لغاية ما حاجة تضرب
الطريقة التانية للتطعيم ودي المفضلة عندي وهي انك تصطاد بالسمكة كاملة
وعلشان تحط السمكة كاملة يبقى قبل ما تحط السلكة في الشعر لازم تطعم السمكة وطريقتها سهلة جدا
السلكة ليها طرفين الطرف الاول بيكون فيه السنارة والطرف التاني اللي بنركبة في الشعر
احنا بقي حنجيب السمكة اللي حنستخدمها كطعم وندخل الطرف الفاضي من السلكة في فم السمكة وتعدية بالراحة داخل بطن السمكة لغاية ما توصل للفتحة اللي في بطن السمكة وتطلع السلكة منها وتعديها وتخلي الداير بتاع السنارة طالع من فم السمكة وتيجي عند ديل السمكة وتربطة بحتة شعر مع السلكة علشان تبقى محكومة كويس وانت بترمي

توكلنا على الله ورمينا
نصيحة لكل اللي عايز يصطاد مياس لازم تفتح وش الماكينة على الاخر علشان لو السمكة شدت ما تكسرش البوصه

المياس بياكل ويشد ودايما بيجري لجوه يعني لازم تديلة براح في الشعر وسيبه يجري براحتة حيتعب ويقف وزي ما قلنا انه مقاوم عنيد جدا بس لما بيتعب بيسلم فماتحاولش انك تتعافى عليه لاني للاسف بشوف ناس بترمي على المياس وفاكرين ان كل ما تكون السمكة قوية يبقى لازم انت تكون اقوى
وانا بقولكم ان كل ما كبر حجم السمكة كل ما كان لازم تكون انت ارق والين على السمكة وكل ما قاومت السمكة لازم تضعف قدامها علشان تقدر تطلعها

اول ما تشدك المياسة افتح القلاب بتاع الماكينة وسيب الشعر حر على الاخر تاخد منه زي ما هي عايزة لغاية ما تقف بعد كده تقفل القلاب وترد في السمكة بكل قوتك لان فم المياس قوي جدا فلازم تتاكد ان السنارة غرزت فيها وعيش واستمتع بمقاومة المياس الجميلة

وربنا يكرمنا جميعا

نصيحة اخيرة
خلوا بالكم لما تطلعوا المياس وانتو بتسلكوا السنارة لان لا قدر الله لو السمكة قفلت بقها على صباعك ممكن تقطعه

كونان · #5 (permalink) 12-22-2008, 12:25 AM

النهاردة زي ما وعدتكم مع
سمكة البوري

ودي صورتها

اسماء البوري
البوري الصغير: جران
البوري المتوسط: بوري
البوري الكبير: كمبوت

اماكن تواجد البوري

البوري بيتواجد في المياة متوسطة العمق يعني من 3 ل 6 متر تقريبا
والبوري عادة بيعيش في مجموعات كبيرة
ومن المناظر الغريبة اللي شفتها بعيني كان في ميناء الدخيلة
المية على مسافة لاتقل عن 2 كم وبعرض الحوض كله مردومة بوري واحجام كبيرة لدرجة ان كان فيه ناس بتمسكة بايديها
وعلى فكرة البوري من الاسماك اللي بتعيش في المية الحلوة والمالحة وفيه معلومة سمعتها ومش متاكد صحتها ان البوري بيهاجر من النيل للبحر علشان يبيض
بس احنا حنتكلم عن صيد البوري في البحر لان عمري ما طلعت بوري من المية الحلوة

موسم صيد البوري

البوري موجود في المية طول السنة بس بيقل جدا في الصيف والشتا يعني لما المية تسخن قوي ولما تبرد قوي

طرق صيد البوري

البوري عادة بنصطاده بالبوصة العادية وده بيكون بطريقتين
الصيد بالفلة او الصيد بالربع (المشنقة)

صيد البوري بالفلة
البوري من الاسماك الحساسة جدا علشان كده لازم نختار وقت الصيد وعدة الصيد المناسبة بمعنى
صيد البوري لازم يكون بهدوء شديد ولو بتصطاد بالنهار لازم تختار مكان ميكونش فيه خيالك على المية يعني ماتكوش الشمس في ضهرك علشان ضلك مايجيش على المية وعلشان كده انسب وقت لصيد البوري بيكون من بعد المغرب لغاية الفجر
الشعر الاساسي مش اكتر من 25
شعر الفروع من 15 ل 20
السلاح 25 ل 20
صيد البوري بالفلة يكون طعمك عجينة ومش اي عجينة لازم تكون طرية وحقولكم ازاي بنعملها في الاخر
بالنسبة لشعر الفروع بيكون قصير يعني فرع 25 سم والتاني 15 او 20 سم
العمق اللي بتصطاد علية يكون نص عمق المية
اطعم العجينة وارمي xxxxxxxxxxxxxxx
غلط غلط غلط
احنا قلنا ان البوري حساس جدا لاي حركة غريبه
لو انت رميت زي ما بترمي يبقى مش حتلاقي ولا بوراية في المية
يبقى احنا لازم ننزل الفلة بالراحة في المية
توكلنا على الله
البوري مش بياكل زي باقي السمك
البوري فيه ناس بيقولو انه بيلحس الطعم وده طبعا مش صحيح لانه بياكل ولكن لان بقه فتحته لفوق وبقه صغير جدا فبيسحب من الطعم حتت صغيرة جدا وعلشان كده لما بياكل بنلاقي ان الفلة مش بتغمز
بنلاقي ان الفلة بتتحرك حركة بسيطة احنا بنقول انه بيخنق الفلة
لما السمكة تاكل معاك اوعى ترد فيها جامد وده لسببين
اولا لاننا قلنا ان اي حركة غريبة حتخلي السمكة تفزع
وثانيا لان بق البوري ضعيف لو اديتة واحدة جامده شوية حتلاقي بقة بس هو اللي طالعلك

صيد البوري بالربع (المشنقة)
الطريقة دي احنا شرحناها في صيد البطاطا
وهي بتكون
شعر اساسي 25
شعر فروع 15 ل 20
الصيد بدون فلة
الشعر الاساسي طولة نص عمق المية
السلاح كبير شوية يعني 6 او 5
وبيكون عدد من 5 ل 7 سنانير بنعمل 3 طولهم حوالي 10 سم والباقي طولهم حوالي 5 سم
ونحط رصاص شريط حوالين مكان توصيل السنانير
الصيد بيكون بعجينة ناشفة
وحنتكلم عنها بعدين
بتحط العجينة على الرصاص وبتنزلها المية بالراحة لغاية ما اللبلوب بتاع البوصة يوصل اول المية
في الطريقة دي البوري هو الي بيوقع نفسة وعلشان كده سموها المشنقة
وممكن نستخدم طعم تاني مع الطريقة دي وهو السردين
ايوه السردين
تشيل راس السردينة وتفتحها من بطنها وتعلقها على السناير يعني تخلي السنانير كلها جوة بطن السردينة وتغرزها فيها من جوة
وربنا يكرمكم بسمكة بوري من اللي بياكل السردين
اقل سمكة تعدي الكيلو ونص

دلوقتي نيجي لصيد البوري بالبوصة والماكينة
محدش يستغرب
بنصطاد البوري بالماكينة وله طريقة واحدة اسمها السندويش
ودي بتكون كالاتي
الشعر الاساسي 40
شعر الفروع 30 او 35 وده لازم لان السمك اللي بيضرب عليك سمك تقيل
السلاح بيكون حوالي من 15 ل 25 سنارة نمرة 20 او ممكن 18
بنربط السنانير كلها طول واحد اللي هو حوالي 15 سم
وكلهم يتوصلو في الشعر الاساسي من نفس المكان اللي هو فوق الرصاصة بحوالي 30 سم
الطعم بيكون عيش بلدي اسمر
بنقطع الرغيف شرايط عرضها حوالي 5 سم وبنلفه على شكل اسطوانة بحيث يكون الجزء الداخلي للرغيف هو اللي برة
ونجيب استيك عادي من بتاع الفلوس ده ونثبت بيه العيش على الشعر الاساسي جنب وصلة الفروع
ونجيب السنانير كلها ونغرزها في العيش بشكل عشوائي ونرمي ونسيبها
وان شاء الله حتلاقي البوصة دي بتعمل زلزال تعرف ان معاك بوراية لا تقل عن اتنين كيلو ونص او تلاتة كيلو

طريقة التحضير لصيد البوري

طريقة التحضير للبوري تنقسم لحاجتين
طرق عمل العجينة

اولا العجينة الطرية
كوب دقيق - مية حسب الاحتياج – سكر
حنحط الدقيق على النار ونقلبة لغاية ما يسمر ونضيف له معلقة سكر صغيرة مش مليانة وبعد كده نضيف المية شوية شوية لغاية ما تلاقي القوام بقى متماسك بيبقى قوامها عامل زي قوام الشحم اللي بنشحم بيه المكن
سيبها تبرد وحطها في علبة
بس لازم لاحظ ان تطعيم العجينة الطرية عايز خبرة لانك لازم تطعمها ببقك بمعنى انك بتاخد حتة عجينة صغيرة ببقك وتحط السنارة في بقك وتلف العجينة على السنارة بلسانك فالغلطة حتلاقي انك اصطدت نفسك في الاخر

ثانيا العجينة الناشفة
ودي بتكون للصيد بالربع وهي عبارة عن عيش بلدي عادي جدا وبنبلة ونعجنة بادينا ونسيبة جنبنا في السمش او الهوا ولو احتاج مية تاني نديلة وده تطعيمة ساهل جدا لانك بتاخد حتة وتحط الرصاصة في نصها وتلف العجينة عليها بايدك زتاكد عليها زي ما تكون بتعمل كفتة كده

تاني حاجة في التحضير لصيد البوري
تحضير المرمى
وهو انك لازم تجمع السمكة الاول وده بيكون بالتزفير
والتزفير بيكون بعيش مبلول في جردل مية لغاية نا يفرول وتعملة كور صغيرة وترمية في المية
والتزفير للبوري شئ اساسي لان البوري بيتجمع على ريحة العيش في المية
وكمان لازم تلاحظ ان مع كل سمكة تطلعها لازم ترميلك كورة او اتنين تزفر بيهم علشان تثبت السمكة تحت منك
التزفير بيكون قبل ما تبتدي تصطاد بفترة ممكن توصل ساعتين او تلاتة ويكون متواصل علشان تقدر تجمع اكبر كمية من البوري

كونان · #6 (permalink) 12-22-2008, 12:27 AM

الموزة

من امتع الاسماك في صيدها وخصوصا لو كانت كبيرة شوية

موسم الموزة

صيد الموزة يبدأ تقريبا من اول شهر فبراير وبيستمر معاك لغاية نص الصيف تقريبا وتقريبا بينتهي مع موسم فيضان النيل
حد ممكن يسالني ايه دخل فيضان النيل بالبحر
اقولكم
معروف طبعا ان النيل بيصب في البحر المتوسط ومع الفيضان بيجي الطمي وعلشان كده بنلاقي مية البحر معكرة في موسم الفيضان وده بيكون موسم لبعض الاسماك زي السردين والميرا والمياس
وفي نفس الوقت اسماك تانية بتهرب من العكرة زي الموزة

طرق صيد الموزة

الموزة غالبا بنصطادها بالبوصة اليد وصعب جدا صيدها بالماكينة الا في عرض البحر (التسقيط)

صيد الموزة بالبوصة اليد

الموزة من الاسماك الحساسة جدا وبقها ضعيف جدا علشان كده بنستخدم سلاح صغير وشعر ضعيف
ودايما الموزة بتكون اسراب كبيرة وبتعوم تحت سطح المية بمتر او مترين
اما في عرض البحر بتكون في نص عمق المية (بين الميتين)

الشعر الاساسي 25
شعر الفروع 18 او 15
ممكن تستخدم 20 بس انا عن نفسي مش بفضله

السلاح 24 او 22 وبالكتير 20

شعر الفروع بيكون قصير يعني طول السلاح 20 سم والتاني 15 سم

الموزة زي ما قلنا سمكة بقها حساس وضعيف وده بيبان من طريقة اكلها لانك بتلاقي الفلة بتغمز بطريقة سريعة زي ما تكون بتترعش
طبعا لو انت رديت في السمكة بقوة اللهم انك حتلاقي بق السمكة بس هو اللي في السنارة علشان كده وانت بتصطاد الموزة مش لازم ترد في السمكة كل اللي عليك هو انك ترفع الفلة من المية
والموزة الكبيرة سمكة قوية لكن اوعى ترخي ايدك وانت بترفعها لانها حتروح منك الموزة لازم ترفعها على العاصي

الطعم المفضل للموزة هو الجمبري العقر او البلانص المقشر وبتقطعه حتت صغيرة وتطعم بيه
وممكن البرغوت بس تشيل الراس
وبعد كده تيجي العجينة
واذا كنت بتصطاد في عرض البحر بيكونالصيد بالماكينة او اللنسة ومن غير فلة وبتعمل 7 او 8 سنانير فوق بعض (سبحة) وتسقط للموزة

كونان · #7 (permalink) 12-22-2008, 12:30 AM

سمك الدنيس
موسم الدنيس من نص اكتوبر تقريبا لاخر فبراير
ولكن
وقت الدنيس الصح ديسمبر ويناير
تاخد منه الكيلوات
الدنيس الصغير يسمى فلّيجس
والكبير دنيس
وفيه نوع بنسمية الملك
وده بيكون فيه لطشة صفرا على خيشومه
وده بقى ربنا يكرمكم وتشدوا منه
تستمتعوا بيه

اماكن تواجد الدنيس
الدنيس بيحب الوعر وبيعيش حواليه في مجموعات
وبيحب برضه الارض الخشنة
يعني لو المكان اللي بترمي فيه مفيش فيه وعر
ورملته خشنة (حصى) حتلاقي الدنيس موجود
وزي ما قلنا انه بيعيش في مجموعات
ودايما بيتحرك في المنطقة في شكل دواير علشان يدور على الاكل
ولو اخدت منه واحده وغاب عليك بعد كده متقلقش حيلف ويجيلك تاني ان شاء الله

طرق صيده
1- بالبوصة الماكينة

الشعر الاساسي 40
الفروع 35 او 30
انا عن نفسي بعمل الشعر الاساسي 40 على فروع 40 برضه

السلاح
لو فيه فليجس في الماية يبقى السلاح نمرة 5 او 4 او 3 بالكتير
ويفضل بكرش
ولو بترمي على تقايل يبقى السلاح نمرة 01 او 02 او 03

بنعمل سلاح واحد بس تحت الرصاصة ويكون متوسط الطول
توكل على الله وارمي
لم البوش شوية بس متخليش الشعر مشدود
حيضربك الاولى سيبه ولا كأنك تعرفه
التانية انتبهله
التالته مترحمهوش رد فيه بقلب جامد
ولما ترد وقف ايدك شوية لغاية ما يبتدي يعافر وبعدين لمه
حد يسألني ليه؟؟
اقولك
لان الدنيس من السمك العفي جدا
لما بترد فيه بيقف مكانه شوية
لو ايدك رخت او حس ببوش في الشعر حيديلك ضهره ويجري
وفي الحالة دي يبقى السمكة راحت لو مش بالعة
مع الدنيس التقيل اللي بيعدي الكيلو ونص والاتنين كيلو
لما بنرد فيه وميرضاش يتحرك
بنريح ايدينا بالبوصة سنة صغيرة علشان يحس بالراحة ويبتدي يتحرك
وبعدها نبتدي نتعامل معاه

ساعات الدنيس بياكل بخباثة
ازاي؟؟؟
تلاقيه الشعر بيبوش لوحده من غير ضرب ولا حاجه
في الحالة دي تلم البوش بحذر
لانه لو حس بالسلاح حيجري العكس ويقطع
وزي ما قلتلكم ان الدنيس سمكة عفية جدا
كفاية اني اقول انه بيكسر الجلاجولة بسنانة
معلش حخرج شوية عن الموضوع واقولكم ايه اللي كان بيحصل معانا مع الدنيس
كنا بنرمي بتكنيات ( كابوريا لونها اسود بنطلعها من بين البلوكات) وفيه ناس بتقول عليها العفاريت
المهم
كان يضرب علينا ياخد الطعم ويجري
لغاية لما واحد بيصطاد معايا ربنا يمسية بكل خير اسمة عم منير
حط القراص بتاع الكايوريا وقال اهو حاجه تستحمل شوية
ويادوب الرصاصة نزلت من هنا ولقينا زلزال في البوصة
الحق يا عم حاسب يا منير وهو طبعا صياد من الصيادين التقال
حوالي نص ساعة بيعافر مع السمكة لغاية ما وصلت تحتنا
بس طبعا علشان ارتفاع البوكات ميقدرش يرفعها
المهم نزلت لقفتها
بسم الله ما شاء الله
دنيسة ملكة طولها نص طولي
عرفت بعد كده انها 3 كيلو ونص
وبعد كده ابتدينا نرميله يالقراص واخدنا صيده يومها اصغر سمكة كيلو الا ربع

المهم نرجع للموضوع

نيجي دلوقتي للطريقة الثانية

2- البوصة العادية
وفيها طريقتين
الحساس
وهو نفس الصيد بالماكينة بس بالبوصة العادية

الصيد بالفلة

وده لازم يكون على قرار عالي
لان الدنيس دايما ماسك الارض

وبتعمل الشعر الاساسي 35
والفروع 30
السلاح لا يقل عن نمرة 6

والفروع بتعمل فرع متر وربع والتاني متر

وطبعا الصيد بالليل
ويفضل والبحر هادي او مريح
لان الدنيس بيسرح والبحر هادي
ركب الفلة الفوسفور وتوكل على الله وارمي
بس لو حسيت ان السمكة تقيلة عليك ومش عارف تتعامل معاها
متعافرش معاها ولو قطعت متزعلش
ملكش نصيب فيها
وفكر دايما ان بوصتك لو اتكسرت مش حتعرف تعوضها
لكن السمكة لو راحت فيه غيرها كتير

نيجي دلوقتي للطعم

الجرايات
تكني- جرايات خضرا - خلخل
مع ان الدنيس دلوقتي مش بياكل غير التكني ومش بيضرب على الجرايات الخضرا الا في الغرب وابوقير
والخلخل بقى انقرض لان مبقاش فيه رملة على الشط وهو جحرة كان بيبقى حفرة في الرملة
فين ايام الخلخل كنا بنقول لو رميت بخلخل في بانيو حتاخد بيه دنيس وقاروس

السردين والسردينيلا
السردينيلا هو السردين الروسي بيبقى مجمد ومش بلاقيه الا عند واحده اسمها ام احمد في سوق باب عمر باشا

الدود
اسمعلاوي – قراص – دود بحر
بس القراص ودود البحر بيلم عليك السمك الرفيع

الجلاجولة
اسمعلاوي – بلدي – بشبش
واللي مش عارف الجلاجولة هي نوع من القواقع البحرية ليها صدفة قوية جدا وبتكون مليانة لحم من جوة احنا بقى بنصطاد باللحم اللي جوة ومتنساش تاخد معاك شاكوش علشان تكسرها
والبشبش هو ذكر الجلاجولة

الجمبري
نطاط – عقر – بلنص – شطنارة – برغوت
البرغوت للبوصة اليد لانه مش بيستحمل الماكينة

دلوقتي اقولكم كل طعم بنستخدمة امتى
الشتاء (موسم الدنيس)
الجرايات – الجلاجولة – السردينيلا
الصيف
الدنيس بيكون موجود بس صغير (فليجس)
الدود – الجمبري
بمعنى
في الصيف طعم طري وفي الشتاء طعم ناشف

اماكن تواجد الدنيس في الاسكندرية
اشهر اماكن تصطاد منها الدنيس

ميناء الاسكندرية
ميناء الدخيلة
السلسلة (الازريطة امام الملاهي)
الشاطبي ( بس خلي بالك من الوعر لانة جامد)
كامب شيزار
سبورتينج
كليوباترا
سيدي جابر
كوبري ستانلي (فيه فليجس كتير)
لسان جليم التاني
سانستيفانو امام سوميد
العصافرة
المنتزة
ميناء ابو قير

كونان · #8 (permalink) 12-22-2008, 12:33 AM

ملاحظة :-
جميع المواضيع منقولة بتصرف عن طريق كونان
كاتب المشاركات هو :-
الاسم: مصطفى
السن: 34 سنة
الهواية: الصيييييييييييييييد
انا اسكندراني حتى النخاع بس مقيم حاليا في الكويت
اكل العيش بقى هههههههههه
اتعلمت الصيد من والدي ربنا يديلة الصحة ويطول عمرة
اول مرة امسك فيها بوصة واصطاد وانا عندي 6 سنين
واول مرة انزل اصطاد لوحدي وانا عندي 8 سنين كنت بنزل على بلوكات سيدي جابر قبل ما يوسعوا الكورنيش
ولغاية وقتنا هذا مبطلتش صيد
ولا عمري حبطل ان شاء الله
المهم
المقصود من الكلام الطويل ده كله
اني عايز بعد اذنكم طبعا
اني اشارك بخبرتي المتواضعة معاكم
كل يوم ان شاء الله حنتكلم عن نوع سمكة من الموجودين في البحر (اسكندرية طبعا)
ونقول ازاي نصطادها وايه الطعم بتاعها ولو بالليل نعمل ايه ولو بالنهار نعمل ايه
ولو اي حد عنده استفسار عن اي نوع سمك انا مش حتأخر لو اعرف
ولو حد عايز يضيف عليا او يعدل اهلا وسهلا
انا عايز افيد واستفيد من الكل